مبارات العرب ضد اسرائيل ..

بقلم حسن النصار ”

مبارات العرب ضد اسرائيل ….كتب. صديق
نقص لاعب
چنه نلعب فرق شعبية عدنه ولد مدافع اسمه ( محمد سبطانه ) ابوه بعثي ثگيل بالمنطقة
هذا كل لعبة يفوت علينه هدفين عكسيات
دمرنه والله
هنوبه المدرب ما يگدر يگعده مصطبة من وره ابوه
بحيث نروح نلعب ويه اي فريق
بس يشوفونه الفريق الخصم كله يجي يبوس بي
محبوب حتى من الخصوم
مرات حتى ما يحتاجون ينزلون مهاجم ضدنه
يوم من الايام عدنه لعبة ويه الفضيلية ( منطقة ببغداد مشهورة بتربية الجاموس)
اجوي فريق الفضيلية واحدهم شاربله سطل حليب جاموس عالريگ
لا ينضربون چتف لا عكس
لاعبهم يوگع على الحصو يگوم ينكت روحه ويلعب
ما الهم حل
و محمد سبطانه اول شوط فوت علينه گول
بدأ الشوط الثاني والخصم عدهم ضربة زاوية علينه
المدرب صاح المدافع الثاني مالتنه
گاله اريدك تگعدلي محمد سبطانه
اصعد وياه اضربه كله براسه
اريد يشيلونه للكندي
گاله كابتن اشلون اضرب مدافعي و احتياط ما عدنه
گاله ما الك علاقة نكمل نقص بس طلعلي محمد سبطانه
والله صعد وياه فلش راسه و طلع سبطانه
كملنه اللعبة نقص و فزنه عليهم …
هسه عاد ولا سالفة التطبيع بين الامارات و اسرائيل
على اساس ٦٠ سنة جبهة مشتعلة بين الامارات واسرائيل
هسه كتبت بال google search
الشهداء الاماراتيين ضد اسرائيل
صفن عليه الگوگل
رجعت بحثت من جديد وكتبت
الصراع الاماراتي الاسرائيلي
الگوگل انسطر و صارله نص ساعة صافن بوجهي
حتى عبالي انترنيت ماكو
يمكن لسان حال الگوگل اليه
( خاب انت هاي الكلاوات منين تجيبها) 😅
عمي دخلي يطلعون من الصراع ونلعب نقص لاعب ضد اسرائيل
شسوي بمحمد سبطانه بفريقك كل لعبة يرجع عليك هدفين …
عاد ولا الامارات بس دخانهم عامينه وهم واسرائيل فرتين فد لباس مو من اليوم من سنين. من يريد تحرير فلسطين ، فليعلن الحرب من هذه اللحظة ، ويدفع بجيوشه نحو أسرائيل ..
المماطلة والتسويف والشعارات النارية والتحديات الفارغة لا تحرر شبرا من الأرض وان بقيت حتى ظهور القائم ، فتظل مجرد هواء في شبك ..
فلسطين لا تبعد سوى بضعة أميال وهي تحت مرمى حجر من صواريخكم وطائراتكم ..!!
كلما تطول المدة في اعلان الحرب على الكيان الغاصب ، يكشف زيفكم ويساعد الأسرائيليين في التمدد وكسب اصدقاء في المنطقة الى جانبهم ويعزلكم ..
…حسن النصار…