يسعد اوقاتكم بكل خير أبراج يوم الأحد

يسعد اوقاتكم بكل خير

أبراج يوم الأحد

28يناير2018

القمر بالجوزاء ♊ واخر السهرة بينتقل لبرج السرطان ♋

الحمل
اليوم فرصة لتحكي رايك وتكون ملفت ومميز بأفكارك ممكن تسافر انت اليوم وقادر تدفع بعلاقاتك لقدام وتتواصل مع ناس جدد .. حلول عندك اليوم وحركة ايجابية مثمرة اذا عرفت تستغلها ونجاح كمان والمسا بتشغلك قصة بتخص عيلتك او اهلك ..
عاطفيا .. فكر اليوم بحبك وغير جو بمشوار رومنسي وقضي اوقات حلوة مع الشريك .. وجمالك 74%

الثور
يوم للربح لمكاسب من شغل اضافي ومصاريف من شي ما بتتوقعو يمكن بس خففلي مصروفك .. مو ضروري تفرد ايدك كتير وتصرف كل شي لان رح تحتاج والمسا بتزيد حركتك وممكن تقابل اشخاص كتار بسهرتك ..
عاطفيا .. حاول تهدى و تحافظ على استمرارية علاقتك واجواء حلوة اليوم .. وجمالك 71%

الجوزاء
بهاليوم عندك فرصة لترجع مكانتك عند الكل وتستعيد ثقتن فيك انت مشرق وقادر تناقش وتكون انت افضل .. افتح صفحة جديدة وعيش يوم مناسب ايجابي وحل لمشكلة وغير وضعك لان بحاجة هيك يوم ومن المسا بتفكر اكتر بوضعك المالي ..
عاطفيا .. يوم بتحس فيه براحة وبترجع الأمور افضل مع الشريك وبتستعيد ثقة الشريك فيك .. وجمالك 92%

السرطان
هاليوم انتبه الامور ما رح تمشي معك انتبهلي لصحتك ولاتحاول تحسم شي لان وضعك تعبان ومعرقل هالفترة .. بس اصبر وخلي هالفترة تمر على خير والمسا بتحس انو بلشت الأمور تصير افضل عندك وممكن تسمع خبر يريحك..
عاطفيا .. حاول تكون منتبه اليوم لأن ممكن يصير معك مشكلة عاطفية او يصير سوء تفاهم .. وجمالك 81%

الأسد
عندك اوقات مهمة وحلوة فيها اخبار حلوة في حدا بساعدك لتصل لمكان انت عم تسعى الو من زمان .. وعم تعزز علاقاتك اليوم وتتعامل مع الأصدقاء باريحية لكن المسا احتمال تحس بتعب او سوء تفاهم يصير معك فانتبه ..
عاطفيا .. حاول تفكر بطريقة مبسطة لعلاقتك ولا تكبر القصص لأن مو لصالحك .. وجمالك 49%

العذراء
اليوم بتحس بتوتر حافظلي على سمعتك ولا تكون متسرع على الرغم من انك ممكن تحرز تقدم ونجاح اذا نظمت امورك .. وكمان انتبهلي من الأخطاء وفرصة عمل جديد ممكنة عندك والمسا ممكن تشوف صديق غالي عليك ..
عاطفيا .. لاتعطي كل ثقتك للشريك وخاصة اذا العلاقة جديدة خليك رومنسي لكن بحذر .. وجمالك 58%

الميزان
بهاليوم انت مشرق وبترجع لنشاطك باتصالات وسفر والحظ بيدعمك بالامور العائلية لتحلها .. وفي اخبار حلوة رح تسمعها استغل هاليوم لان الحظ معك بكون والمسا لازم تنتبه لوضعك العام وماتستفز حدا ..
عاطفيا .. حب جديد ممكن يصادفك او حدا من الماضي يحاكيك .. وجمالك 86%

العقرب
بدي ياك تكون متفهم ودبلماسي وخفف من مصاريفك وفي فرص لامور مهمة وتغيير بوضعك للأفضل .. بس بدك تكون لين وما تعاند على رايك وانتبه لصحتك ممكن تتعب بس انت بفترة افضل لاتخاف والمسا اتصالات وتحسن كبير عندك ..
عاطفيا .. لاتسمح لاسلوب الشريك يستفزك وخليك رايق وتفهم الوضع قدر الامكان .. وجمالك 68%

القوس
عندك يوم مهم للشراكة عقد معاملة فيك تشتغل بهالمجال بس انتبه من توترك الزايد وتفكيرك ولاتعصب كل شوي .. بدنا منك رواق وعندك فرص حلوة لبداية شراكة والمسا بتناقش امور مالية وبتحس انك صرت بوضع اريح ..
عاطفيا .. لاتترك مجال للشك بعلاقتك وحاول تبحث عن حلول ويمكن عندك نهاية علاقة هاليومين أو ارتباط جديد للأعذب … وجمالك 61%

الجدي
انتبه بيتراكم عليك شغل كتير وانت تعبان وامورك الصحية مو تمام دير بالك ونظم وقتك واكلك وكل شي رح يكون منيح .. خليك دقيق وماتهمل شي وممكن تغيير بشغلك او عمل جديد والمسا ممكن تفكر بشراكات جديدة وانتبه من انفعالك الزايد ..
عاطفيا .. فكر بالاستقرار بعيد عن المشاكل ولاتستفز الشريك .. وجمالك 50%

الدلو
بيحمل هاليوم انفراجة وحلول لكتير مشاكل عندك عم تحس براحة نسبية وعم ترجع لعافيتك استغل هالفترة وصلح مشاكلك مع العيلة والاحباب .. وابتعد عن المزاجية ليكون يوم مميز وفي حظوظ وفرص ولكن المسا بدك تكون جاهز لان احتمال يتراكم الشغل عليك ..
عاطفيا .. انت بأفضل الايام عاطفيا حاول تحدد خياراتك وتستقر على حبك .. وجمالك 89%

الحوت
احتمال يكون في قصص وعرقلة وخاصة بالبيت عندك هدي الاوضاع وكون حكيم عم تدخل يوم فيه مواجهات وانت مو مرتاح بس ممكن تكون هادي وتحل المشاكل برواق .. وتعامل بمرونة وبدون نرفزة لأن الوضع مو متحمل وممكن عم تغير مكان سكنك والمسا بترتاح وبتلاقي حلول وبتسمع اخبار افضل الك ..
عاطفيا .. ماعم تكون مبسوط وعم تفقد ثقتك بكتار يمكن انت بحاجة لحبيب حقيقي هالفترة بس ماعم تلاقي هالشي وجمالك 57%