نعاس حارس

بقلم : الشاعر سيف علي

نعاس بجفن حارس…………ماتحبك عين.
جيتك مورزق كابوس………..عله الحلمان.

حرمل واليطكك……………فصل ماينطيك.
نزل وبموتك……………محد يشك قمصان.

ماي مغسل شما………………تنذكر مكروه.
ماتنهظم لو حطك…………..بجف عطشان.

حچاية مرت ابو…………كوه المحنه عليك.
من تكلي احبك بيه……………احس خذلان.

طحت يمك حزن………..جبت الهلاهل ثار.
وانه استحي بحزنك………….مالبسة ألوان.

كلمن حضه وي………..لون البيض يعيش.
لو بالحج يحطك.…………….لو بجف دفان.

وضميت الوجع…….بس الدمع بي صوت.
شكد تحارب………………وماينظم الااذان.

وصيت ميت عله……….الورث من حبوك.
بس تفرغ يشمرونك…………قلم خلاصان.

كحل عانس كشختك………بس للمريات.
ماخليك لمعة…………….ابدلت العرسان.

شامة بنص نساوه……….شلون اكشخ بيك.
ريش غراب لو مو…………تصفك الجنحان.

غشتني ضحكتك……………..والهلا البلعين.
تره سلوبه حلو الي……………بوك بالميزان.

شلتك غطة جنازة…………وروحي موتابوت.
وضاك الهوى بصدري………..وانه موغركان.

جادر فاتحه ضلوعي………عله روحي تصير.
حتى ابموتي………………..مااكلف الصحبان.

بنص أهلي وعشت…………خطار بين الناس.
من شفت الاحبه…………….يكول ياهو فلان.

صده من تحجي……..بس حجيك يرد عليك.
ماينسمع صوتك………………حده للحيطان.

للشاعر سيف علي
تاريخ القصيدة(1/15 /2017)