بس تعالو

بس تعالو

،،،،،،،،،
بس تعالو
فرحو روحي العذبتني اتريدكم
سهري ما مر عاليالي
حالي حال النجم حالي

والله لو احچيلكم
بأول احچايه تهل دموعكم.

اشلون نوصل والخناجر
بالخواصر نابته..
اشلون نوصل والدرابين
بحزنكم بايته..
اشلون نوصل ونتو عزائيل
يم بيبانكم شد رايته..
اشلون نوصل والدرب ظلمه
وشمعتك خافته..
اشلون نوصل والچوادر
بالمأتم ثابته..
شلون نوصل والسوالف
بالشفايف ساكته..

بس تعالو
لو اجيتو چفونه انحنيها
گلوبنا الماتنسه همكم
هلبّت انسيها..
هلبت بختنا ايجيبكم
ونشم روايح طيبكم
هلبت..

اشلون نوصل..؟
بيا ادروب انمر عليكم
والجدم مشلوله..
اشلون نوصل..؟
والگلوب بكل رصاصات
الهجر مكتوله..
اشلون نوصل والحناجر
غصت بهلهوله..
اشلون نوصل..؟
وهلبت الماترد روحي
لاتظن مقبوله..

وما اصدگ حتى لو جيتو وگعدتو
عيوني احس بيهن غشى وما گولن انتو
لان صرتو مستحيل
ماتجونا لانهار ولابليل

لا تصدگ چلمه بالليل
انحچت..
لاتصدگ
والعيون الذلها هجرك
ما بچت..
لاتصدگ
والجروح الي بسببكم
ماشفت..
ولاتصدگ
غافيه احلام السنين
وما صحت..

بس تعالو

بس تعالو

زهير العقابي